ངོ་རིས་དང་གཟུགས་གཞི།
དེ་བཟུམ་སྦེ་ ང་བཅས་ར་ཆ་ཁྱབ་ཀྱི་ ག་ནི་བ་ལེགས་པའི་ ཙཱ་རི་གནས་ཀྱི་མྱུག་མ་འདྲ་བའི་གཟུགས་འདི་ ནམ་ཅིག་གི་དུས་ལུ་ སྟོབས་ཉམས་ཏེ་ མཛེས་པའི་རྣམ་འགྱུར་བཏོན་ཏེ་ འཁྱུག་འཁྱུག་ལྡེམ་ལྡེམ་སྦེ་འགྱོ་ནི་ ཕར་བཞག་ ལམ་འགྱོ་བའི་ཚེ་ འཁརཝ་ལུ་བརྟེན་དགོཔ་ད་ སྡོད་པའི་ཚེ་ ཕྲང་ཕྲང་སྡོད་མ་ཚུགས་པའི་ཁར་ ལོང་པའི་ཚེ་ཡང་ རང་བཞིན་གྱིས་ ལོང་མ་ཚུགས་པར་ ལགཔ་གཉིས་ཆ་ར་ ས་ཁར་བཙུགས་ཏེ་ རོ་ཁྱི་བཟུམ་བཟོ་སྟེ་ ལོང་དགོ་ནི་ཨིན་མས།
མེ་ཏོག་པད་མ་དང་འདྲ་བའི་ གདོང་གི་དཀྱིལ་འཁོར་འདི་ཡང་ ལེགས་པའི་ཁ་དོག་ཡལ་ཏེ་ གཉེརམ་གིས་གང་ མ་མཛེས་པའི་ཁྲོ་གཉེར་ཅན་ལུ་འགྱུར་ཏེ་ དབང་པོ་སྒོ་ལྔ་ ག་ར་ཉམས་ནི་ཨིནམ་ལས་ མི་རྩ་རྒས་བཟུམ་ལུ་འགྱུར་ཏེ་ གཞན་གྱིས་བརྙས་བཅོས་འབད་དེ་ མེས་མེད་བསྐྱུར་ཏེ་ ཚོད་བལྟ་བ་གིས་མ་ཚད་ མགུ་ཏོག་ཁ་ལས་འཛེགས་ཏེ་འོང་རུང་རང་ ག་ནི་ཡང་འབད་མ་ཚུགསཔ་ལས་གནམ་མེད་ས་མེད་ ཕམ་སྟེ་སྡོད་དགོཔ་འབྱུངམ་ཨིན།
སློབ་དཔོན་འཕགས་པ་ཀླུ་སྒྲུབ་ཀྱིས་་་་་་་ རིགས་དང་གཟུགས་དང་ཐོས་པ་ལང་འཚོ་དང་། །དབང་ཐང་ཆེ་བའི་རྒྱགས་པ་དགྲ་བཞིན་གཟིགས། ། ཟེར་གསུངས་དོ་བཟུམ་ གཟུགས་གཞི་ལེགས་ཤོམ་དང་ངོ་རིས་འཇའ་རིསམོ་ལུ་ བརྟེན་པའི་ང་རྒྱལ་ལུ་ གཙོ་བོར་བཏོན་ནི་སྤང་དགོཔ་འདི་གལ་ཆེ། །
No comments:
Post a Comment